جس سر کو غرور آج ہے یاں تاجوری کا

جس سر کو غرور آج ہے یاں تاجوری کا

کل اس پہ یہیں شور ہے پھر نوحہ گری کا

شرمندہ ترے رخ سے ہے رخسار پری کا

چلتا نہیں کچھ آگے ترے کبک دری کا

آفاق کی منزل سے گیا کون سلامت

اسباب لٹا راہ میں یاں ہر سفری کا

زنداں میں بھی شورش نہ گئی اپنے جنوں کی

اب سنگ مداوا ہے اس آشفتہ سری کا

ہر زخم جگر داور محشر سے ہمارا

انصاف طلب ہے تری بیداد گری کا

اپنی تو جہاں آنکھ لڑی پھر وہیں دیکھو

آئینے کو لپکا ہے پریشاں نظری کا

صد موسم گل ہم کو تہ بال ہی گزرے

مقدور نہ دیکھا کبھو بے بال و پری کا

اس رنگ سے جھمکے ہے پلک پر کہ کہے تو

ٹکڑا ہے مرا اشک عقیق جگری کا

کل سیر کیا ہم نے سمندر کو بھی جا کر

تھا دست نگر پنجۂ مژگاں کی تری کا

لے سانس بھی آہستہ کہ نازک ہے بہت کام

آفاق کی اس کارگہ شیشہ گری کا

ٹک میرؔ جگر سوختہ کی جلد خبر لے

کیا یار بھروسا ہے چراغ سحری کا

jis sar ko ghurur aj hai yan tajwari ka

kal us pe yahin shor hai phir nauha giri ka

sharminda tire rukh se hai rukhsar pari ka

chalta nahin kuchh age tire kabk-e-dari ka

afaq ki manzil se gaya kaun salamat

asbab luta rah mein yan har safari ka

zindan mein bhi shorish na gai apne junun ki

ab sang mudawa hai is ashufta siri ka

har zakhm-e-jigar dawar-e-mahshar se hamara

insaf talab hai tiri bedad giri ka

apni to jahan ankh lari phir wahin dekho

aine ko lapka hai pareshan nazari ka

sad mausam-e-gul ham ko tah bal hi guzre

maqdur na dekha kabhu be bal-o-pari ka

is rang se jhamke hai palak par ke kahe to

tukra hai mira ashk aqiq-e-jigri ka

kal sair kiya ham ne samundar ko bhi ja kar

tha dast nagar panja-e-mizhgan ki tiri ka

le sans bhi ahista ke nazuk hai bahut kam

afaq ki is karga-e-shisha giri ka

tuk mir-e-jigar sokhta ki jald khabar le

kya yar bharosa hai charagh-e-sahari ka