ہستی اپنی حباب کی سی ہے

ہستی اپنی حباب کی سی ہے

یہ نمائش سراب کی سی ہے

نازکی اس کے لب کی کیا کہیے

پنکھڑی اک گلاب کی سی ہے

چشم دل کھول اس بھی عالم پر

یاں کی اوقات خواب کی سی ہے

بار بار اس کے در پہ جاتا ہوں

حالت اب اضطراب کی سی ہے

نقطۂ خال سے ترا ابرو

بیت اک انتخاب کی سی ہے

میں جو بولا کہا کہ یہ آواز

اسی خانہ خراب کی سی ہے

آتش غم میں دل بھنا شاید

دیر سے بو کباب کی سی ہے

دیکھیے ابر کی طرح اب کے

میری چشم پر آب کی سی ہے

میرؔ ان نیم باز آنکھوں میں

ساری مستی شراب کی سی ہے

hasti apni habab ki si hai

ye numaish sarab ki si hai

nazuki us ke lab ki kya kahiye

pankhuri ik gulab ki si hai

chashm-e-dil khol is bhi alam par

yan ki auqat khwab ki si hai

bar bar us ke dar pe jata hun

halat ab iztirab ki si hai

nuqta-e-khal se tira abru

bit ik intikhab ki si hai

main jo bola kaha ke ye awaz

isi khana kharab ki si hai

atish-e-gham mein dil bhuna shayad

der se bu kabab ki si hai

dekhiye abr ki tarah ab ke

meri chashm par ab ki si hai

mir un nim baz ankhon mein

sari masti sharab ki si hai