الٹی ہو گئیں سب تدبیریں کچھ نہ دوا نے کام کیا

الٹی ہو گئیں سب تدبیریں کچھ نہ دوا نے کام کیا

دیکھا اس بیماری دل نے آخر کام تمام کیا

عہد جوانی رو رو کاٹا پیری میں لیں آنکھیں موند

یعنی رات بہت تھے جاگے صبح ہوئی آرام کیا

حرف نہیں جاں بخشی میں اس کی خوبی اپنی قسمت کی

ہم سے جو پہلے کہہ بھیجا سو مرنے کا پیغام کیا

ناحق ہم مجبوروں پر یہ تہمت ہے مختاری کی

چاہتے ہیں سو آپ کریں ہیں ہم کو عبث بدنام کیا

سارے رند اوباش جہاں کے تجھ سے سجود میں رہتے ہیں

بانکے ٹیڑھے ترچھے تیکھے سب کا تجھ کو امام کیا

سرزد ہم سے بے ادبی تو وحشت میں بھی کم ہی ہوئی

کوسوں اس کی اور گئے پر سجدہ ہر ہر گام کیا

کس کا کعبہ کیسا قبلہ کون حرم ہے کیا احرام

کوچے کے اس کے باشندوں نے سب کو یہیں سے سلام کیا

شیخ جو ہے مسجد میں ننگا رات کو تھا مے خانے میں

جبہ خرقہ کرتا ٹوپی مستی میں انعام کیا

کاش اب برقعہ منہ سے اٹھا دے ورنہ پھر کیا حاصل ہے

آنکھ مندے پر ان نے گو دیدار کو اپنے عام کیا

یاں کے سپید و سیہ میں ہم کو دخل جو ہے سو اتنا ہے

رات کو رو رو صبح کیا یا دن کو جوں توں شام کیا

صبح چمن میں اس کو کہیں تکلیف ہوا لے آئی تھی

رخ سے گل کو مول لیا قامت سے سرو غلام کیا

ساعد سیمیں دونوں اس کے ہاتھ میں لا کر چھوڑ دیئے

بھولے اس کے قول و قسم پر ہائے خیال خام کیا

کام ہوئے ہیں سارے ضائع ہر ساعت کی سماجت سے

استغنا کی چوگنی ان نے جوں جوں میں ابرام کیا

ایسے آہوئے رم خوردہ کی وحشت کھونی مشکل تھی

سحر کیا اعجاز کیا جن لوگوں نے تجھ کو رام کیا

میرؔ کے دین و مذہب کو اب پوچھتے کیا ہو ان نے تو

قشقہ کھینچا دیر میں بیٹھا کب کا ترک اسلام کیا

ulti ho gain sab tadbiren kuchh na dawa ne kam kiya

dekha is bimari dil ne akhir kam tamam kiya

ahd-e-jawani ro ro kata piri mein len ankhen mund

yaani rat bahut the jage subh hui aram kiya

harf nahin jan bakhshi mein us ki khubi apni qismat ki

ham se jo pahle kah bheja so marne ka paigham kiya

nahaq ham majburon par ye tohmat hai mukhtari ki

chahte hain so ap karen hain ham ko abas badnam kiya

sare rind-e-aubash jahan ke tujh se sujud mein rahte hain

banke terhe tirchhe tikhe sab ka tujh ko imam kiya

sarzad ham se be adabi to wahshat mein bhi kam hi hui

koson us ki aur gae par sajda har har gam kya

kis ka kaaba kaisa qibla kaun haram hai kya ehram

kuche ke us ke bashindon ne sab ko yahin se salam kiya

shaikh jo hai masjid mein nanga rat ko tha mai khane mein

jubba khirqa karta topi masti mein inam kiya

kash ab barqaaa munh se utha de warna phir kya hasil hai

ankh mande par un ne go didar ko apne am kya

yan ke saped-o-siyah mein ham ko dakhl jo hai so itna hai

rat ko ro ro subh kiya ya din ko jun tun sham kiya

subh-e-chaman mein us ko kahin taklif hua le ai thi

rukh se gul ko mol liya qamat se sarw ghulam kiya

said simin donon us ke hath mein la kar chhor diye

bhule us ke qaul-o-qasam par hae khayal-e-kham kya

kam hue hain sare zae har saat ki samajat se

istighna ki chauguni un ne jun jun mein ibram kiya

aise ahu-e-ram khurda ki wahshat khoni mushkil thi

sehr kiya ejaz kya jin logon ne tujh ko ram kiya

mir ke din-o-mazhab ko ab puchhte kya ho un ne to

qashqa khincha der mein baitha kab ka tark-e-islam kiya