ہوں جو سارے دست و پا ہیں خوں میں نہلائے ہوئے

ہوں جو سارے دست و پا ہیں خوں میں نہلائے ہوئے

ہم بھی ہیں اے دل بہاراں کی قسم کھائے ہوئے

خبط ہے اے ہم نشیں عقل حریفان بہار

ہے خزاں ان کی انہیں آئینہ دکھلائے ہوئے

کیا ہے ذکر آتش و آہن کہ غداران گل

مارتے ہیں ہاتھ انگاروں پہ گھبرائے ہوئے

زندگی کی قدر سیکھی شکریہ تیغ ستم

ہاں ہمیں تھے کل تلک جینے سے اکتائے ہوئے

سیر ساحل کر چکے اے موج ساحل سر نہ مار

تجھ سے کیا بہلیں گے طوفانوں کے بہلائے ہوئے

ہے یہی اک کاروبار نغمہ و مستی کہ ہم

یا زمیں پر یا سر افلاک ہیں چھائے ہوئے

ساز اٹھایا جب تو گرماتے پھرے ذروں کے دل

جام ہاتھ آیا تو مہر و مہ کے ہمسائے ہوئے

دشت و در بننے کو ہیں مجروحؔ میدان بہار

آ رہی ہے فصل گل پرچم کو لہرائے ہوئے

hun jo sare dast-o-pa hain khun mein nehlae hue

ham bhi hain ai dil baharan ki qasam khae hue

khabt hai ai ham nashin aql-e-harifan-e-bahar

hai khizan un ki unhen aina dikhlae hue

kya hai zikr-e-atish-o-ahan ke ghaddaran-e-gul

marte hain hath angaron pe ghabrae hue

zindagi ki qadar sikhi shukriya tegh-e-sitam

han hamen the kal talak jine se uktae hue

sair-e-sahil kar chuke ai mauj-e-sahil sar na mar

tujh se kya bahlenge tufanon ke bahlae hue

hai yahi ik karobar-e-naghma-o-masti ke ham

ya zamin par ya sar-e-aflak hain chhae hue

saz uthaya jab to garmate phire zarron ke dil

jam hath aya to mehr-o-mah ke hamsae hue

dasht-o-dar banne ko hain majruh maidan-e-bahar

a rahi hai fasl-e-gul parcham ko lahrae hue