دست پر خوں کو کف دست نگاراں سمجھے

دست پر خوں کو کف دست نگاراں سمجھے

قتل گہہ تھی جسے ہم محفل یاراں سمجھے

کچھ بھی دامن میں نہیں خار ملامت کے سوا

اے جنوں ہم بھی کسے کوئے بہاراں سمجھے

ٹوٹے دھاگے ہی سے کرتے ہیں رفو چاک جگر

کون بے چارگیٔ سینہ فگاراں سمجھے

ہاں وہ بے درد تو بیگانہ ہی اچھا یارو

جو نہ توقیر غم درد گساراں سمجھے

خندہ زن اس پہ رہے حلقۂ زنجیر جنوں

جو نہ کچھ منزلت سلسلہ داراں سمجھے

آج سے ہم نے بھی زخموں کو تبسم جانا

رزم کو بزم گہہ لالہ عذاراں سمجھے

توڑ دیں ہم جو نہ تلوار تو کہیے مجروحؔ

تیغ زن کیا ہنر زخم شعاراں سمجھے

dast pur khun ko kaf-e-dast-e-nigaran samjhe

qatl gah thi jise ham mahfil yaran samjhe

kuchh bhi daman mein nahin khar malamat ke siwa

ai junun ham bhi kise ku-e-baharan samjhe

tute dhage hi se karte hain rafu chak-e-jigar

kaun be chargi-e-sina figaran samjhe

han wo be dard to begana hi achchha yaro

jo na tauqir-e-gham-e-dard gusaran samjhe

khanda zan us pe rahe halqa-e-zanjir-e-junun

jo na kuchh manzilat-e-silsila daran samjhe

aj se ham ne bhi zakhmon ko tabassum jana

razm ko bazm-e-gah lala izaran samjhe

tor den ham jo na talwar to kahiye majruh

tegh zan kya hunar-e-zakhm shiaran samjhe