جو سمجھاتے بھی آ کر واعظ برہم تو کیا کرتے

جو سمجھاتے بھی آ کر واعظ برہم تو کیا کرتے

ہم اس دنیا کے آگے اس جہاں کا غم تو کیا کرتے

حرم سے مے کدے تک منزل یک عمر تھی ساقی

سہارا گر نہ دیتی لغزش پیہم تو کیا کرتے

جو مٹی کو مزاج گل عطا کر دیں وہ اے واعظ

زمیں سے دور فکر جنت آدم تو کیا کرتے

سوال ان کا جواب ان کا سکوت ان کا خطاب ان کا

ہم ان کی انجمن میں سر نہ کرتے خم تو کیا کرتے

جہاں مجروحؔ دل کے حوصلے ٹوٹیں نگاہوں سے

وہاں کرتے بھی مرگ شوق کا ماتم تو کیا کرتے

jo samjhate bhi a kar waiz-e-barham to kya karte

ham is duniya ke age is jahan ka gham to kya karte

haram se mai kade tak manzil-e-yak umr thi saqi

sahara gar na deti laghzish-e-paiham to kya karte

jo mitti ko mizaj-e-gul ata kar den wo ai waiz

zamin se dur fikr-e-jannat adam to kiya karte

sawal un ka jawab un ka sukut un ka khitab un ka

ham un ki anjuman mein sar na karte kham to kya karte

jahan majruh dil ke hausle tuten nigahon se

wahan karte bhi marg-e-shauq ka matam to kya karte