ڈرا کے موج و تلاطم سے ہم نشینوں کو

ڈرا کے موج و تلاطم سے ہم نشینوں کو

یہی تو ہیں جو ڈبویا کئے سفینوں کو

شراب ہو ہی گئی ہے بقدر پیمانہ

بہ عزم ترک نچوڑا جب آستینوں کو

جمال صبح دیا روئے نو بہار دیا

مری نگاہ بھی دیتا خدا حسینوں کو

ہماری راہ میں آئے ہزار مے خانے

بھلا سکے نہ مگر ہوش کے قرینوں کو

کبھی نظر بھی اٹھائی نہ سوئے بادۂ ناب

کبھی چڑھا گئے پگھلا کے آبگینوں کو

یہی جہاں ہے جہنم یہی جہاں فردوس

بتاؤ عالم بالا کے سیربینوں کو

ہوئے ہیں قافلے ظلمت کی وادیوں میں رواں

چراغ راہ کئے خوں چکاں جبینوں کو

تجھے نہ مانے کوئی تجھ کو اس سے کیا مجروحؔ

چل اپنی راہ بھٹکنے دے نکتہ چینوں کو

dara ke mauj-o-talatum se ham nashinon ko

yahi to hain jo duboya kiye safinon ko

sharab ho hi gai hai baqadr-e-paimana

ba azm-e-tark nichora jab astinon ko

jamal-e-subh diya ru-e-nau bahar diya

miri nigah bhi deta khuda hasinon ko

hamari rah mein ae hazar mai khane

bhula sake na magar hosh ke qarinon ko

kabhi nazar bhi uthai na su-e-bada-e-nab

kabhi charha gae pighla ke abginon ko

yahi jahan hai jahannam yahi jahan firdaus

batao alam-e-bala ke sairbainon ko

hue hain qafile zulmat ki wadiyon mein rawan

charagh-e-rah kiye khun chakan jabinon ko

tujhe na mane koi tujh ko us se kya majruh

chal apni rah bhatakne de nukta chainon ko