آ نکل کے میداں میں دو رخی کے خانے سے
Majrooh Sultanpuri (1919–2000)آ نکل کے میداں میں دو رخی کے خانے سے
کام چل نہیں سکتا اب کسی بہانے سے
عہد انقلاب آیا دور آفتاب آیا
منتظر تھیں یہ آنکھیں جس کی اک زمانے سے
اب زمین گائے گی ہل کے ساز پر نغمے
وادیوں میں ناچیں گے ہر طرف ترانے سے
اہل دل اگائیں گے خاک سے مہ و انجم
اب گہر سبک ہوگا جو کے ایک دانے سے
منچلے بنیں گے اب رنگ و بو کے پیراہن
اب سنور کے نکلے گا حسن کارخانے سے
عام ہوگا اب ہم دم سب پہ فیض فطرت کا
بھر سکیں گے اب دامن ہم بھی اس خزانے سے
میں کہ ایک محنت کش میں کہ تیرگی دشمن
صبح نو عبارت ہے میرے مسکرانے سے
خودکشی ہی راس آئی دیکھ بد نصیبوں کو!
خود سے بھی گریزاں ہیں بھاگ کر زمانے سے
اب جنوں پہ وہ ساعت آ پڑی کہ اے مجروحؔ
آج زخم سر بہتر دل پہ چوٹ کھانے سے
a nikal ke maidan mein do rukhi ke khane se
kam chal nahin sakta ab kisi bahane se
ahd-e-inqilab aya dur aftab aya
muntazir thin ye ankhen jis ki ik zamane se
ab zamin gaegi hal ke saz par naghme
wadiyon mein nachenge har taraf tarane se
ahl-e-dil ugaenge khak se mah-o-anjum
ab guhar subuk hoga jo ke ek dane se
manchale banenge ab rang-o-bu ke pairahan
ab sanwar ke niklega husn karkhane se
am hoga ab ham dam sab pe faiz-e-fitrat ka
bhar sakenge ab daman ham bhi is khazane se
main ke ek mehnat kash mein ke tirgi dushman
subh-e-nau ibarat hai mere muskurane se
khudkushi hi ras ai dekh bad nasibon ko!
khud se bhi gurezan hain bhag kar zamane se
ab junun pe wo saat a pari ke ai majruh
aj zakhm-e-sar behtar dil pe chot khane se