اب میں پیام فصل بہاراں کو کیا کروں

اب میں پیام فصل بہاراں کو کیا کروں

دامن کہاں سے لاؤں گریباں کو کیا کروں

تاثیر سوزش غم پنہاں کو کیا کروں

رنگ پریدۂ رخ جاناں کو کیا کروں

پیدا یہیں سے میرا نشیمن بھی ہو تو جائے

بے اعتباریٔ غم زنداں کو کیا کروں

تیری نوازشوں نے بکھیرے ہزار گل

لیکن میں اپنی تنگئ داماں کو کیا کروں

یوں تو ہر ایک درد نے بخشی حیات نو

میں فطرت حیات گریزاں کو کیا کروں

تم کیا ملے کہ مل گئیں ساری مسرتیں

اب یہ بتاؤ دیدۂ گریاں کو کیا کروں

احساسؔ کیسے کیسے ہوئی تھی سحر نصیب

پھر آ رہی ہے اب شب ہجراں کو کیا کروں

ab main payam-e-fasl-e-baharan ko kya karun

daman kahan se laun gareban ko kya karun

tasir sozish-e-gham-e-pinhan ko kya karun

rang-e-parida-e-rukh janan ko kya karun

paida yahin se mera nasheman bhi ho to jae

be etibari-e-gham-e-zindan ko kya karun

teri nawazishon ne bikhere hazar gul

lekin main apni tangi-e-daman ko kya karun

yun to har ek dard ne bakhshi hayat-e-nau

main fitrat-e-hayat gurezan ko kya karun

tum kya mile ke mil gain sari masarraten

ab ye batao dida-e-giryan ko kya karun

ehsas kaise kaise hui thi sahar nasib

phir a rahi hai ab shab-e-hijran ko kya karun