اہل طوفاں آؤ دل والوں کا افسانہ کہیں

اہل طوفاں آؤ دل والوں کا افسانہ کہیں

موج کو گیسو بھنور کو چشم جانانہ کہیں

دار پر چڑھ کر لگائیں نعرۂ زلف صنم

سب ہمیں باہوش سمجھیں چاہے دیوانہ کہیں

یار نکتہ داں کدھر ہے پھر چلیں اس کے حضور

زندگی کو دل کہیں اور دل کو نذرانہ کہیں

تھامیں اس بت کی کلائی اور کہیں اس کو جنوں

چوم لیں منہ اور اسے انداز رندانہ کہیں

سرخی مے کم تھی میں نے چھو لیے ساقی کے ہونٹ

سر جھکا ہے جو بھی اب ارباب مے خانہ کہیں

تشنگی ہی تشنگی ہے کس کو کہیے مے کدہ

لب ہی لب ہم نے تو دیکھے کس کو پیمانہ کہیں

پارۂ دل ہے وطن کی سرزمیں مشکل یہ ہے

شہر کو ویران یا اس دل کو ویرانہ کہیں

اے رخ زیبا بتا دے اور ابھی ہم کب تلک

تیرگی کو شمع تنہائی کو پروانہ کہیں

آرزو ہی رہ گئی مجروحؔ کہتے ہم کبھی

اک غزل ایسی جسے تصویر جانانہ کہیں

ahl-e-tufan ao dil walon ka afsana kahin

mauj ko gesu bhanwar ko chashm-e-janana kahin

dar par charh kar lagaen naara-e-zulf-e-sanam

sab hamen bahosh samjhen chahe diwana kahin

yar nukta dan kidhar hai phir chalen us ke huzur

zindagi ko dil kahin aur dil ko nazrana kahin

thamen us but ki kalai aur kahin us ko junun

chum len munh aur use andaz-e-rindana kahin

surkhi-e-mai kam thi main ne chhu liye saqi ke hont

sar jhuka hai jo bhi ab arbab-e-mai khana kahin

tishnagi hi tishnagi hai kis ko kahiye mai kada

lab hi lab ham ne to dekhe kis ko paimana kahin

para-e-dil hai watan ki sarzamin mushkil ye hai

shahr ko wiran ya is dil ko wirana kahin

ai rukh-e-zeba bata de aur abhi ham kab talak

tirgi ko sham-e-tanhai ko parwana kahin

arzu hi rah gai majruh kahte ham kabhi

ik ghazal aisi jise taswir janana kahin