دشمن کی دوستی ہے اب اہل وطن کے ساتھ

دشمن کی دوستی ہے اب اہل وطن کے ساتھ

ہے اب خزاں چمن میں نئے پیرہن کے ساتھ

سر پر ہوائے ظلم چلے سو جتن کے ساتھ

اپنی کلاہ کج ہے اسی بانکپن کے ساتھ

کس نے کہا کہ ٹوٹ گیا خنجر فرنگ

سینے پہ زخم نو بھی ہے داغ کہن کے ساتھ

جھونکے جو لگ رہے ہیں نسیم بہار کے

جنبش میں ہے قفس بھی اسیر چمن کے ساتھ

مجروحؔ قافلے کی مرے داستاں یہ ہے

رہبر نے مل کے لوٹ لیا راہزن کے ساتھ

dushman ki dosti hai ab ahl-e-watan ke sath

hai ab khizan chaman mein nae pairahan ke sath

sar par hawa-e-zulm chale so jatan ke sath

apni kulah-e-kaj hai isi bankpan ke sath

kis ne kaha ke tut gaya khanjar-e-farang

sine pe zakhm-e-nau bhi hai dagh-e-kuhan ke sath

jhonke jo lag rahe hain nasim-e-bahar ke

jumbish mein hai qafas bhi asir-e-chaman ke sath

majruh qafile ki mire dastan ye hai

rahbar ne mil ke laut liya rahzan ke sath