اب اہل درد یہ جینے کا اہتمام کریں

اب اہل درد یہ جینے کا اہتمام کریں

اسے بھلا کے غم زندگی کا نام کریں

فریب کھا کے ان آنکھوں کا کب تلک اے دل

شراب خام پئیں رقص نا تمام کریں

غم حیات نے آوارہ کر دیا ورنہ

تھی آرزو کہ ترے در پہ صبح و شام کریں

نہ مانگوں بادۂ گلگوں سے بھیک مستی کی

اگر ترے لب لعلیں مرا یہ کام کریں

نہ دیکھیں دیر و حرم سوئے رہروان حیات

یہ قافلے تو نہ جانے کہاں قیام کریں

ہیں اس کشاکش پیہم میں زندگی کے مزے

پھر ایک بار کوئی سعئ نا تمام کریں

سکھائیں دست طلب کو ادائے بیباکی

پیام زیرلبی کو صلائے عام کریں

غلام رہ چکے توڑیں یہ بند رسوائی

کچھ اپنے بازوئے محنت کا احترام کریں

زمیں کو مل کے سنواریں مثال روئے نگار

رخ نگار سے روشن چراغ بام کریں

پھر اٹھ کے گرم کریں کاروبار زلف و جنوں

پھر اپنے ساتھ اسے بھی اسیر دام کریں

مری نگاہ میں ہے ارض ماسکو مجروحؔ

وہ سرزمیں کہ ستارے جسے سلام کریں

ab ahl-e-dard ye jine ka ehtimam karen

use bhula ke gham-e-zindagi ka nam karen

fareb kha ke in ankhon ka kab talak ai dil

sharab-e-kham piyen raqs-e-na tamam karen

gham-e-hayat ne awara kar diya warna

thi arzu ke tire dar pe subh-o-sham karen

na mangun bada-e-gulgun se bhik masti ki

agar tire lab-e-laalen mira ye kam karen

na dekhen dair-o-haram su-e-rahrawan-e-hayat

ye qafile to na jane kahan qayam karen

hain is kashakash-e-paiham mein zindagi ke maze

phir ek bar koi sai-e-na tamam karen

sikhaen dast-e-talab ko ada-e-bebaki

payam zerilabi ko sala-e-am karen

ghulam rah chuke toren ye band-e-ruswai

kuchh apne bazu-e-mehnat ka ehtiram karen

zamin ko mil ke sanwaren misal-e-ru-e-nigar

rukh-e-nigar se raushan charagh-e-bam karen

phir uth ke garm karen karobar-e-zulf-o-junun

phir apne sath use bhi asir-e-dam karen

miri nigah mein hai arz-e-masko majruh

wo sarzamin ke sitare jise salam karen