مسرتوں کو یہ اہل ہوس نہ کھو دیتے

مسرتوں کو یہ اہل ہوس نہ کھو دیتے

جو ہر خوشی میں ترے غم کو بھی سمو دیتے

کہاں وہ شب کہ ترے گیسوؤں کے سائے میں

خیال صبح سے ہم آستیں بھگو دیتے

بہانے اور بھی ہوتے جو زندگی کے لیے

ہم ایک بار تری آرزو بھی کھو دیتے

بچا لیا مجھے طوفاں کی موج نے ورنہ

کنارے والے سفینہ مرا ڈبو دیتے

جو دیکھتے مری نظروں پہ بندشوں کے ستم

تو یہ نظارے مری بے بسی پہ رو دیتے

کبھی تو یوں بھی امنڈتے سرشک غم مجروحؔ

کہ میرے زخم تمنا کے داغ دھو دیتے

masarraton ko ye ahl-e-hawas na kho dete

jo har khushi mein tire gham ko bhi samo dete

kahan wo shab ke tire gesuon ke sae mein

khayal subh se ham astin bhigo dete

bahane aur bhi hote jo zindagi ke liye

ham ek bar tiri arzu bhi kho dete

bacha liya mujhe tufan ki mauj ne warna

kinare wale safina mira dubo dete

jo dekhte miri nazron pe bandishon ke sitam

to ye nazare miri be basi pe ro dete

kabhi to yun bhi umandte sarishk-e-gham majruh

ke mere zakhm-e-tamanna ke dagh dho dete