آہ جاں سوز کی محرومی تاثیر نہ دیکھ

آہ جاں سوز کی محرومی تاثیر نہ دیکھ

ہو ہی جائے گی کوئی جینے کی تدبیر نہ دیکھ

حادثے اور بھی گزرے تری الفت کے سوا

ہاں مجھے دیکھ مجھے اب میری تصویر نہ دیکھ

یہ ذرا دور پہ منزل یہ اجالا یہ سکوں

خواب کو دیکھ ابھی خواب کی تعبیر نہ دیکھ

دیکھ زنداں سے پرے رنگ چمن جوش بہار

رقص کرنا ہے تو پھر پاؤں کی زنجیر نہ دیکھ

کچھ بھی ہوں پھر بھی دکھے دل کی صدا ہوں ناداں

میری باتوں کو سمجھ تلخئ تقریر نہ دیکھ

وہی مجروحؔ وہی شاعر آوارہ مزاج

کوئی اٹھا ہے تری بزم سے دلگیر نہ دیکھ

ah jan soz ki mahrumi-e-tasir na dekh

ho hi jaegi koi jine ki tadbir na dekh

hadse aur bhi guzre tiri ulfat ke siwa

han mujhe dekh mujhe ab meri taswir na dekh

ye zara dur pe manzil ye ujala ye sukun

khwab ko dekh abhi khwab ki taabir na dekh

dekh zindan se pare rang-e-chaman josh-e-bahar

raqs karna hai to phir paon ki zanjir na dekh

kuchh bhi hun phir bhi dikhe dil ki sada hun nadan

meri baton ko samajh talkhi-e-taqrir na dekh

wahi majruh wahi shayar-e-awara mizaj

koi utha hai tiri bazm se dilgir na dekh