جلا کے مشعل جاں ہم جنوں صفات چلے

جلا کے مشعل جاں ہم جنوں صفات چلے

جو گھر کو آگ لگائے ہمارے ساتھ چلے

دیار شام نہیں منزل سحر بھی نہیں

عجب نگر ہے یہاں دن چلے نہ رات چلے

ہمارے لب نہ سہی وہ دہان زخم سہی

وہیں پہنچتی ہے یارو کہیں سے بات چلے

ستون دار پہ رکھتے چلو سروں کے چراغ

جہاں تلک یہ ستم کی سیاہ رات چلے

ہوا اسیر کوئی ہم نوا تو دور تلک

بپاس طرز نوا ہم بھی ساتھ ساتھ چلے

بچا کے لائے ہم اے یار پھر بھی نقد وفا

اگرچہ لٹتے رہے رہزنوں کے ہاتھ چلے

پھر آئی فصل کہ مانند برگ آوارہ

ہمارے نام گلوں کے مراسلات چلے

قطار شیشہ ہے یا کاروان ہم سفراں

خرام جام ہے یا جیسے کائنات چلے

بھلا ہی بیٹھے جب اہل حرم تو اے مجروحؔ

بغل میں ہم بھی لیے اک صنم کا ہاتھ چلے

jala ke mashal-e-jan ham junun sifat chale

jo ghar ko ag lagae hamare sath chale

dayar-e-sham nahin manzil-e-sahar bhi nahin

ajab nagar hai yahan din chale na rat chale

hamare lab na sahi wo dahan-e-zakhm sahi

wahin pahunchti hai yaro kahin se bat chale

sutun dar pe rakhte chalo saron ke charagh

jahan talak ye sitam ki siyah rat chale

hawa asir koi ham nawa to dur talak

bapas tarz-e-nawa ham bhi sath sath chale

bacha ke lae ham ai yar phir bhi naqd-e-wafa

agarche lutte rahe rahzanon ke hath chale

phir ai fasl ke manind-e-barg-e-awara

hamare nam gulon ke maraslat chale

qatar shisha hai ya karwan ham safaran

khiram jam hai ya jaise kainat chale

bhala hi baithe jab ahl-e-haram to ai majruh

baghal mein ham bhi liye ik sanam ka hath chale