ہم کو جنوں کیا سکھلاتے ہو ہم تھے پریشاں تم سے زیادہ

ہم کو جنوں کیا سکھلاتے ہو ہم تھے پریشاں تم سے زیادہ

چاک کئے ہیں ہم نے عزیزو چار گریباں تم سے زیادہ

چاک جگر محتاج رفو ہے آج تو دامن صرف لہو ہے

اک موسم تھا ہم کو رہا ہے شوق بہاراں تم سے زیادہ

عہد وفا یاروں سے نبھائیں ناز حریفاں ہنس کے اٹھائیں

جب ہمیں ارماں تم سے سوا تھا اب ہیں پشیماں تم سے زیادہ

ہم بھی ہمیشہ قتل ہوئے اور تم نے بھی دیکھا دور سے لیکن

یہ نہ سمجھنا ہم کو ہوا ہے جان کا نقصاں تم سے زیادہ

جاؤ تم اپنے بام کی خاطر ساری لویں شمعوں کی کتر لو

زخم کے مہر و ماہ سلامت جشن چراغاں تم سے زیادہ

دیکھ کے الجھن زلف دوتا کی کیسے الجھ پڑتے ہیں ہوا سے

ہم سے سیکھو ہم کو ہے یارو فکر نگاراں تم سے زیادہ

زنجیر و دیوار ہی دیکھی تم نے تو مجروحؔ مگر ہم

کوچہ کوچہ دیکھ رہے ہیں عالم زنداں تم سے زیادہ

ham ko junun kya sukhlate ho ham the pareshan tum se ziyada

chak kiye hain ham ne azizo char gareban tum se ziyada

chak-e-jigar mohtaj-e-rafu hai aj to daman sirf lahu hai

ik mausam tha ham ko raha hai shauq baharan tum se ziyada

ahd-e-wafa yaron se nibhaen naz harifan hans ke uthaen

jab hamen arman tum se siwa tha ab hain pasheman tum se ziyada

ham bhi hamesha qatl hue aur tum ne bhi dekha dur se lekin

ye na samajhna ham ko hua hai jan ka nuqsan tum se ziyada

jao tum apne bam ki khatir sari lawen shamon ki katar lo

zakhm ke mehr-o-mah salamat jashn-e-charaghan tum se ziyada

dekh ke uljhan zulf-e-duta ki kaise ulajh parte hain hawa se

ham se sikho ham ko hai yaro fikr nigaran tum se ziyada

zanjir-o-diwar hi dekhi tum ne to majruh magar ham

kucha kucha dekh rahe hain alam zindan tum se ziyada