اکیلے ہیں وہ اور جھنجھلا رہے ہیں

اکیلے ہیں وہ اور جھنجھلا رہے ہیں

مری یاد سے جنگ فرما رہے ہیں

یہ کیسی ہوائے ترقی چلی ہے

دیے تو دیے دل بجھے جا رہے ہیں

الٰہی مرے دوست ہوں خیریت سے

یہ کیوں گھر میں پتھر نہیں آ رہے ہیں

بہشت تصور کے جلوے ہیں میں ہوں

جدائی سلامت مزے آ رہے ہیں

قیامت کے آنے میں رندوں کو شک تھا

جو دیکھا تو واعظ چلے آ رہے ہیں

بہاروں میں بھی مے سے پرہیز توبہ

خمارؔ آپ کافر ہوئے جا رہے ہیں

akele hain wo aur jhanjhla rahe hain

miri yad se jang farma rahe hain

ye kaisi hawa-e-taraqqi chali hai

diye to diye dil bujhe ja rahe hain

ilahi mire dost hun khairiyat se

ye kyun ghar mein patthar nahin a rahe hain

bahisht-e-tasawwur ke jalwe hain main hun

judai salamat maze a rahe hain

qayamat ke ane mein rindon ko shak tha

jo dekha to waiz chale a rahe hain

baharon mein bhi mai se parhez tauba

khumar ap kafir hue ja rahe hain