سجدوں کی رسم کہن کو ہوش گنوا کے بھول جا

سجدوں کی رسم کہن کو ہوش گنوا کے بھول جا

سنگ در حبیب پر سر کو جھکا کے بھول جا

عشق کو برقرار رکھ دل کو لگا کے بھول جا

اس سے بھی مطمئن نہ ہو اس کو بھی پا کے بھول جا

دل سے تڑپ جدا نہ کر ساز کو بے صدا نہ کر

درد جو ہو فغاں طلب ہونٹھ ہلا کے بھول جا

درد اٹھے اٹھا کرے چوٹ لگے لگا کرے

کچھ بھی ہو تو بہ نام دوست ہنس کے ہنسا کے بھول جا

جام بہ دست و مے بہ جام یوں ہی گزار صبح و شام

زیست کی تلخیاں مدام پی کے پلا کے بھول جا

منزل عشق سے گزر بے خود و مست و بے خبر

چوٹ لگے تو اف نہ کر دل کو دبا کے بھول جا

گزرے ہوئے زمانے کو یاد نہ کر کبھی خمارؔ

اور جو یاد آ ہی جائے اشک بہا کے بھول جا

sajdon ki rasm-e-kuhan ko hosh ganwa ke bhul ja

sang-e-dar-e-habib par sar ko jhuka ke bhul ja

ishq ko barqarar rakh dil ko laga ke bhul ja

us se bhi mutmain na ho us ko bhi pa ke bhul ja

dil se tarap juda na kar saz ko be sada na kar

dard jo ho fughan talab honth hila ke bhul ja

dard uthe utha kare chot lage laga kare

kuchh bhi ho to ba nam-e-dost hans ke hansa ke bhul ja

jam ba dast-o-mai ba jam yun hi guzar-e-subh-o-sham

zist ki talkhiyan mudam pi ke pila ke bhul ja

manzil-e-ishq se guzar be khud-o-mast-o-be khabar

chot lage to uf na kar dil ko daba ke bhul ja

guzre hue zamane ko yad na kar kabhi khumar

aur jo yad a hi jae ashk baha ke bhul ja