مجھ کو یہ جان و دل قبول نغمے کو نغمہ ہی سمجھ

مجھ کو یہ جان و دل قبول نغمے کو نغمہ ہی سمجھ

ساز یہ بیتتی ہے کیا یہ بھی کبھی کبھی سمجھ

عشق ہے تشنگی کا نام توڑ دے گر ملے بھی جام

شدت تشنگی نہ دیکھ لذت تشنگی سمجھ

حسن کی مہربانیاں عشق کے حق میں زہر ہیں

حسن کے اجتناب تک عشق کی زندگی سمجھ

ترک تعلقات بھی عین تعلقات ہے

آگ بجھی ہوئی نہ جان آگ دبی ہوئی سمجھ

عقل کے کاروبار میں دل کو بھی رکھ شریک کار

دل کے معاملات میں عقل کو اجنبی سمجھ

غنچہ و گل کے ساتھ ساتھ دل کی طرف بھی اک نظر

شیفتۂ شگفتگی وجہ شگفتگی سمجھ

ایسے بھی راز ہیں خمارؔ ہوتے نہیں جو آشکار

اپنی ہی مشکلیں نہ دیکھ ان کی بھی بے بسی سمجھ

mujh ko ye jan-o-dil qubul naghme ko naghma hi samajh

saz ye bitti hai kya ye bhi kabhi kabhi samajh

ishq hai tishnagi ka nam tor de gar mile bhi jam

shiddat-e-tishnagi na dekh lazzat-e-tishnagi samajh

husn ki mehrbaniyan ishq ke haq mein zahr hain

husn ke ijtinab tak ishq ki zindagi samajh

tark-e-taalluqat bhi ain taalluqat hai

ag bujhi hui na jan ag dabi hui samajh

aql ke karobar mein dil ko bhi rakh sharik-e-kar

dil ke muamalat mein aql ko ajnabi samajh

ghuncha-o-gul ke sath sath dil ki taraf bhi ik nazar

shefta-e-shaguftagi wajh-e-shaguftagi samajh

aise bhi raz hain khumar hote nahin jo ashkar

apni hi mushkilen na dekh un ki bhi be basi samajh