کبھی جو میں نے مسرت کا اہتمام کیا

کبھی جو میں نے مسرت کا اہتمام کیا

بڑے تپاک سے غم نے مجھے سلام کیا

ہزار ترک تعلق کا اہتمام کیا

مگر جہاں وہ ملے دل نے اپنا کام کیا

زمانے والوں کے ڈر سے اٹھا نہ ہاتھ مگر

نظر سے اس نے بصد معذرت سلام کیا

کبھی ہنسے کبھی آہیں بھریں کبھی روئے

بقدر مرتبہ ہر غم کا احترام کیا

ہمارے حصے کی مے کام آئے پیاسوں کے

ز راہ خیر گناہ شکست جام کیا

طلوع مہر سے بھی گھر کی تیرگی نہ گھٹی

اک اور شب کٹی یا میں نے دن تمام کیا

دعا یہ ہے نہ ہوں گمراہ ہم سفر میرے

خمارؔ میں نے تو اپنا سفر تمام کیا

kabhi jo main ne masarrat ka ehtimam kiya

bare tapak se gham ne mujhe salam kiya

hazar tark-e-taalluq ka ehtimam kiya

magar jahan wo mile dil ne apna kam kiya

zamane walon ke dar se utha na hath magar

nazar se us ne basad maazarat salam kiya

kabhi hanse kabhi ahen bharen kabhi roe

baqadr-e-martaba har gham ka ehtiram kiya

hamare hisse ki mai kam ae pyason ke

ze rah khair gunah-e-shikast-e-jam kiya

tulu-e-mehr se bhi ghar ki tirgi na ghati

ik aur shab kati ya main ne din tamam kya

dua ye hai na hun gumrah ham safar mere

khumar main ne to apna safar tamam kiya