ہنسنے والے اب ایک کام کریں

ہنسنے والے اب ایک کام کریں

جشن گریہ کا اہتمام کریں

ہم بھی کر لیں جو روشنی گھر میں

پھر اندھیرے کہاں قیام کریں

مجھ کو محرومیٔ نظارہ قبول

آپ جلوے نہ اپنے عام کریں

اک گزارش ہے حضرت ناصح

آپ اب اور کوئی کام کریں

آ چلیں اس کے در پہ اب اے دل

زندگی کا سفر تمام کریں

ہاتھ اٹھتا نہیں ہے دل سے خمارؔ

ہم انہیں کس طرح سلام کریں

hansne wale ab ek kam karen

jashn-e-girya ka ehtimam karen

ham bhi kar len jo raushni ghar mein

phir andhere kahan qayam karen

mujh ko mahrumi-e-nazara qubul

ap jalwe na apne am karen

ik guzarish hai hazrat-e-naseh

ap ab aur koi kam karen

a chalen us ke dar pe ab ai dil

zindagi ka safar tamam karen

hath uthta nahin hai dil se khumar

ham unhen kis tarah salam karen