تو چاہئے نہ تیری وفا چاہئے مجھے

تو چاہئے نہ تیری وفا چاہئے مجھے

کچھ بھی نہ تیرے غم کے سوا چاہئے مجھے

مرنے سے پہلے شکل ہی اک بار دیکھ لوں

اے موت زندگی کا پتا چاہئے مجھے

یا رب معاف کر کے نہ دے کرب انفعال

میں نے خطائیں کی ہیں سزا چاہئے مجھے

خاموشئ حیات سے اکتا گیا ہوں میں

اب چاہے دل ہی ٹوٹے صدا چاہئے مجھے

ان مست مست آنکھوں میں آنسو ارے غضب

یہ عشق ہے تو قہر خدا چاہئے مجھے

ناصح نصیحتوں کا زمانہ گزر گیا

اب پیارے صرف تیری دعا چاہئے مجھے

ہر درد کو دوا کی ضرورت ہے اے خمارؔ

جو درد خود ہو اپنی دوا چاہئے مجھے

tu chahiye na teri wafa chahiye mujhe

kuchh bhi na tere gham ke siwa chahiye mujhe

marne se pahle shakl hi ik bar dekh lun

ai maut zindagi ka pata chahiye mujhe

ya rab muaf kar ke na de karb-e-infial

main ne khataen ki hain saza chahiye mujhe

khamoshi-e-hayat se ukta gaya hun main

ab chahe dil hi tute sada chahiye mujhe

un mast mast ankhon mein ansu are ghazab

ye ishq hai to qahr-e-khuda chahiye mujhe

naseh nasihaton ka zamana guzar gaya

ab pyare sirf teri dua chahiye mujhe

har dard ko dawa ki zarurat hai ai khumar

jo dard khud ho apni dawa chahiye mujhe