وہ ہمیں جس قدر آزماتے رہے

وہ ہمیں جس قدر آزماتے رہے

اپنی ہی مشکلوں کو بڑھاتے رہے

وہ اکیلے میں بھی جو لجاتے رہے

ہو نہ ہو ان کو ہم یاد آتے رہے

یاد کرنے پہ بھی دوست آئے نہ یاد

دوستوں کے کرم یاد آتے رہے

آنکھیں سوکھی ہوئی ندیاں بن گئیں

اور طوفاں بدستور آتے رہے

پیار سے ان کا انکار برحق مگر

لب یہ کیوں دیر تک تھرتھراتے رہے

تھیں کمانیں تو ہاتھوں میں اغیار کے

تیر اپنوں کی جانب سے آتے رہے

کر لیا سب نے ہم سے کنارا مگر

ایک ناصح غریب آتے جاتے رہے

مے کدے سے نکل کر جناب خمارؔ

کعبہ و دیر میں خاک اڑاتے رہے

wo hamen jis qadar azmate rahe

apni hi mushkilon ko barhate rahe

wo akele mein bhi jo lajate rahe

ho na ho un ko ham yad ate rahe

yad karne pe bhi dost ae na yad

doston ke karam yad ate rahe

ankhen sukhi hui nadiyan ban gain

aur tufan badastur ate rahe

pyar se un ka inkar barhaq magar

lab ye kyun der tak thartharate rahe

thin kamanen to hathon mein aghyar ke

tir apnon ki janib se ate rahe

kar liya sab ne ham se kinara magar

ek naseh gharib ate jate rahe

mai kade se nikal kar janab-e-khumar

kaaba-o-dair mein khak urate rahe