ایسا نہیں کہ ان سے محبت نہیں رہی

ایسا نہیں کہ ان سے محبت نہیں رہی

جذبات میں وہ پہلی سی شدت نہیں رہی

ضعف قویٰ نے آمد پیری کی دی نوید

وہ دل نہیں رہا وہ طبیعت نہیں رہی

سر میں وہ انتظار کا سودا نہیں رہا

دل پر وہ دھڑکنوں کی حکومت نہیں رہی

کمزوریٔ نگاہ نے سنجیدہ کر دیا

جلووں سے چھیڑ چھاڑ کی عادت نہیں رہی

ہاتھوں سے انتقام لیا ارتعاش نے

دامان یار سے کوئی نسبت نہیں رہی

پیہم طواف کوچۂ جاناں کے دن گئے

پیروں میں چلنے پھرنے کی طاقت نہیں رہی

چہرے کو جھریوں نے بھیانک بنا دیا

آئینہ دیکھنے کی بھی ہمت نہیں رہی

اللہ جانے موت کہاں مر گئی خمارؔ

اب مجھ کو زندگی کی ضرورت نہیں رہی

aisa nahin ke un se mohabbat nahin rahi

jazbat mein wo pahli si shiddat nahin rahi

zof-e-qawi ne amad-e-piri ki di nawed

wo dil nahin raha wo tabiat nahin rahi

sar mein wo intizar ka sauda nahin raha

dil par wo dharkanon ki hukumat nahin rahi

kamzori-e-nigah ne sanjida kar diya

jalwon se chher chhar ki adat nahin rahi

hathon se intiqam liya irtiash ne

daman-e-yar se koi nisbat nahin rahi

paiham tawaf-e-kucha-e-janan ke din gae

pairon mein chalne phirne ki taqat nahin rahi

chehre ko jhiriyon ne bhayanak bana diya

aina dekhne ki bhi himmat nahin rahi

allah jane maut kahan mar gai khumar

ab mujh ko zindagi ki zarurat nahin rahi