وہی پھر مجھے یاد آنے لگے ہیں

وہی پھر مجھے یاد آنے لگے ہیں

جنہیں بھولنے میں زمانے لگے ہیں

وہ ہیں پاس اور یاد آنے لگے ہیں

محبت کے ہوش اب ٹھکانے لگے ہیں

سنا ہے ہمیں وہ بھلانے لگے ہیں

تو کیا ہم انہیں یاد آنے لگے ہیں

ہٹائے تھے جو راہ سے دوستوں کی

وہ پتھر مرے گھر میں آنے لگے ہیں

یہ کہنا تھا ان سے محبت ہے مجھ کو

یہ کہنے میں مجھ کو زمانے لگے ہیں

ہوائیں چلیں اور نہ موجیں ہی اٹھیں

اب ایسے بھی طوفان آنے لگے ہیں

قیامت یقیناً قریب آ گئی ہے

خمارؔ اب تو مسجد میں جانے لگے ہیں

wahi phir mujhe yad ane lage hain

jinhen bhulne mein zamane lage hain

wo hain pas aur yad ane lage hain

mohabbat ke hosh ab thikane lage hain

suna hai hamen wo bhulane lage hain

to kya ham unhen yad ane lage hain

hatae the jo rah se doston ki

wo patthar mire ghar mein ane lage hain

ye kahna tha un se mohabbat hai mujh ko

ye kahne mein mujh ko zamane lage hain

hawaen chalen aur na maujen hi uthen

ab aise bhi tufan ane lage hain

qayamat yaqinan qarib a gai hai

khumar ab to masjid mein jane lage hain