تنگ آغوش میں آباد کروں گا تجھ کو

تنگ آغوش میں آباد کروں گا تجھ کو

ہوں بہت شاد کہ ناشاد کروں گا تجھ کو

فکر ایجاد میں گم ہوں مجھے غافل نہ سمجھ

اپنے انداز پر ایجاد کروں گا تجھ کو

نشہ ہے راہ کی دوری کا کہ ہم راہ ہے تو

جانے کس شہر میں آباد کروں گا تجھ کو

میری بانہوں میں بہکنے کی سزا بھی سن لے

اب بہت دیر میں آزاد کروں گا تجھ کو

میں کہ رہتا ہوں بصد ناز گریزاں تجھ سے

تو نہ ہوگا تو بہت یاد کروں گا تجھ کو

tang aghosh mein abad karunga tujh ko

hun bahut shad ke nashad karunga tujh ko

fikr ijad mein gum hun mujhe ghafil na samajh

apne andaz par ijad karunga tujh ko

nasha hai rah ki duri ka ke ham rah hai tu

jane kis shahr mein abad karunga tujh ko

meri banhon mein bahakne ki saza bhi sun le

ab bahut der mein azad karunga tujh ko

main ke rahta hun basad naz gurezan tujh se

tu na hoga to bahut yad karunga tujh ko