روح پیاسی کہاں سے آتی ہے — جون ایلیا (Jaun Elia)

روح پیاسی کہاں سے آتی ہے

یہ اداسی کہاں سے آتی ہے

ہے وہ یک سر سپردگی تو بھلا

بد حواسی کہاں سے آتی ہے

وہ ہم آغوش ہے تو پھر دل میں

نا شناسی کہاں سے آتی ہے

ایک زندان بے دلی اور شام

یہ صبا سی کہاں سے آتی ہے

تو ہے پہلو میں پھر تری خوشبو

ہو کے باسی کہاں سے آتی ہے

دل ہے شب سوختہ سو اے امید

تو ندا سی کہاں سے آتی ہے

میں ہوں تجھ میں اور آس ہوں تیری

تو نراسی کہاں سے آتی ہے