آپ اپنا غبار تھے ہم تو

آپ اپنا غبار تھے ہم تو

یاد تھے یادگار تھے ہم تو

پردگی ہم سے کیوں رکھا پردہ

تیرے ہی پردہ دار تھے ہم تو

وقت کی دھوپ میں تمہارے لیے

شجر سایہ دار تھے ہم تو

اڑے جاتے ہیں دھول کے مانند

آندھیوں پر سوار تھے ہم تو

ہم نے کیوں خود پہ اعتبار کیا

سخت بے اعتبار تھے ہم تو

شرم ہے اپنی بار باری کی

بے سبب بار بار تھے ہم تو

کیوں ہمیں کر دیا گیا مجبور

خود ہی بے اختیار تھے ہم تو

تم نے کیسے بھلا دیا ہم کو

تم سے ہی مستعار تھے ہم تو

خوش نہ آیا ہمیں جیے جانا

لمحے لمحے پہ بار تھے ہم تو

سہہ بھی لیتے ہمارے طعنوں کو

جان من جاں نثار تھے ہم تو

خود کو دوران حال میں اپنے

بے طرح ناگوار تھے ہم تو

تم نے ہم کو بھی کر دیا برباد

نادر روزگار تھے ہم تو

ہم کو یاروں نے یاد بھی نہ رکھا

جونؔ یاروں کے یار تھے ہم تو

ap apna ghubar the ham to

yad the yadgar the ham to

pardagi ham se kyun rakha parda

tere hi parda dar the ham to

waqt ki dhup mein tumhare liye

shajar-e-saya dar the ham to

ure jate hain dhul ke manind

andhiyon par sawar the ham to

ham ne kyun khud pe etibar kiya

sakht be etibar the ham to

sharm hai apni bar bari ki

be sabab bar bar the ham to

kyun hamen kar diya gaya majbur

khud hi be ikhtiyar the ham to

tum ne kaise bhula diya ham ko

tum se hi mustaar the ham to

khush na aya hamen jiye jana

lamhe lamhe pe bar the ham to

sah bhi lete hamare taanon ko

jan-e-man jan nisar the ham to

khud ko dauran hal main apne

be tarah nagawar the ham to

tum ne ham ko bhi kar diya barbad

nadir-e-rozgar the ham to

ham ko yaron ne yad bhi na rakha

jon yaron ke yar the ham to