ایذا دہی کی داد جو پاتا رہا ہوں میں

ایذا دہی کی داد جو پاتا رہا ہوں میں

ہر ناز آفریں کو ستاتا رہا ہوں میں

اے خوش خرام پاؤں کے چھالے تو گن ذرا

تجھ کو کہاں کہاں نہ پھراتا رہا ہوں میں

اک حسن بے مثال کی تمثیل کے لیے

پرچھائیوں پہ رنگ گراتا رہا ہوں میں

کیا مل گیا ضمیر ہنر بیچ کر مجھے

اتنا کہ صرف کام چلاتا رہا ہوں میں

روحوں کے پردہ پوش گناہوں سے بے خبر

جسموں کی نیکیاں ہی گناتا رہا ہوں میں

تجھ کو خبر نہیں کہ ترا کرب دیکھ کر

اکثر ترا مذاق اڑاتا رہا ہوں میں

شاید مجھے کسی سے محبت نہیں ہوئی

لیکن یقین سب کو دلاتا رہا ہوں میں

اک سطر بھی کبھی نہ لکھی میں نے تیرے نام

پاگل تجھی کو یاد بھی آتا رہا ہوں میں

جس دن سے اعتماد میں آیا ترا شباب

اس دن سے تجھ پہ ظلم ہی ڈھاتا رہا ہوں میں

اپنا مثالیہ مجھے اب تک نہ مل سکا

ذروں کو آفتاب بناتا رہا ہوں میں

بیدار کر کے تیرے بدن کی خود آگہی

تیرے بدن کی عمر گھٹاتا رہا ہوں میں

کل دوپہر عجیب سی اک بے دلی رہی

بس تیلیاں جلا کے بجھاتا رہا ہوں میں

iza dahi ki dad jo pata raha hun main

har naz afrin ko satata raha hun main

ai khush khiram paon ke chhale to gin zara

tujh ko kahan kahan na pharata raha hun main

ik husn-e-be misal ki tamsil ke liye

parchhaiyon pe rang girata raha hun main

kya mil gaya zamir-e-hunar bech kar mujhe

itna ke sirf kam chillata raha hun main

ruhon ke parda posh gunahon se be khabar

jismon ki nekiyan hi ginata raha hun main

tujh ko khabar nahin ke tira karb dekh kar

aksar tira mazaq urata raha hun main

shayad mujhe kisi se mohabbat nahin hui

lekin yaqin sab ko dilata raha hun main

ik satr bhi kabhi na likhi main ne tere nam

pagal tujhi ko yad bhi ata raha hun main

jis din se etimad mein aya tira shabab

us din se tujh pe zulm hi dhata raha hun main

apna misalye mujhe ab tak na mil saka

zarron ko aftab banata raha hun main

bedar kar ke tere badan ki khud agahi

tere badan ki umr ghatata raha hun main

kal dopahar ajib si ik be dili rahi

bas teliyan jala ke bujhata raha hun main