بہت دل کو کشادہ کر لیا کیا

بہت دل کو کشادہ کر لیا کیا

زمانے بھر سے وعدہ کر لیا کیا

تو کیا سچ مچ جدائی مجھ سے کر لی

تو خود اپنے کو آدھا کر لیا کیا

ہنر مندی سے اپنی دل کا صفحہ

مری جاں تم نے سادہ کر لیا کیا

جو یکسر جان ہے اس کے بدن سے

کہو کچھ استفادہ کر لیا کیا

بہت کترا رہے ہو مغبچوں سے

گناہ ترک بادہ کر لیا کیا

یہاں کے لوگ کب کے جا چکے ہیں

سفر جادہ بہ جادہ کر لیا کیا

اٹھایا اک قدم تو نے نہ اس تک

بہت اپنے کو ماندہ کر لیا کیا

تم اپنی کج کلاہی ہار بیٹھیں

بدن کو بے لبادہ کر لیا کیا

بہت نزدیک آتی جا رہی ہو

بچھڑنے کا ارادہ کر لیا کیا

bahut dil ko kushada kar liya kya

zamane bhar se waada kar liya kya

to kya sach much judai mujh se kar li

tu khud apne ko adha kar liya kya

hunar mandi se apni dil ka safha

miri jan tum ne sada kar liya kya

jo yaksar jan hai us ke badan se

kaho kuchh istifada kar liya kya

bahut katra rahe ho mughbachon se

gunah-e-tark-e-bada kar liya kya

yahan ke log kab ke ja chuke hain

safar jada ba jada kar liya kya

uthaya ik qadam tu ne na us tak

bahut apne ko manda kar liya kya

tum apni kaj kulahi har baithen

badan ko be labada kar liya kya

bahut nazdik ati ja rahi ho

bichharne ka irada kar liya kya