سر ہی اب پھوڑیے ندامت میں

سر ہی اب پھوڑیے ندامت میں

نیند آنے لگی ہے فرقت میں

ہیں دلیلیں ترے خلاف مگر

سوچتا ہوں تری حمایت میں

روح نے عشق کا فریب دیا

جسم کو جسم کی عداوت میں

اب فقط عادتوں کی ورزش ہے

روح شامل نہیں شکایت میں

عشق کو درمیاں نہ لاؤ کہ میں

چیختا ہوں بدن کی عسرت میں

یہ کچھ آسان تو نہیں ہے کہ ہم

روٹھتے اب بھی ہیں مروت میں

وہ جو تعمیر ہونے والی تھی

لگ گئی آگ اس عمارت میں

زندگی کس طرح بسر ہوگی

دل نہیں لگ رہا محبت میں

حاصل کن ہے یہ جہان خراب

یہی ممکن تھا اتنی عجلت میں

پھر بنایا خدا نے آدم کو

اپنی صورت پہ ایسی صورت میں

اور پھر آدمی نے غور کیا

چھپکلی کی لطیف صنعت میں

اے خدا جو کہیں نہیں موجود

کیا لکھا ہے ہماری قسمت میں

sar hi ab phoriye nadamat mein

nind ane lagi hai furqat mein

hain dalilen tire khilaf magar

sochta hun tiri himayat mein

ruh ne ishq ka fareb diya

jism ko jism ki adawat mein

ab faqat adaton ki warzish hai

ruh shamil nahin shikayat mein

ishq ko darmiyan na lao ke main

chikhta hun badan ki usrat mein

ye kuchh asan to nahin hai ke ham

ruthte ab bhi hain murawwat mein

wo jo taamir hone wali thi

lag gai ag is imarat mein

zindagi kis tarah basar hogi

dil nahin lag raha mohabbat mein

hasil kin hai ye jahan-e-kharab

yahi mumkin tha itni ujlat mein

phir banaya khuda ne adam ko

apni surat pe aisi surat mein

aur phir admi ne ghaur kiya

chhipkali ki latif sanat mein

ai khuda jo kahin nahin maujud

kya likha hai hamari qismat mein