گل سخن سے اندھیروں میں تاب کاری کر

گل سخن سے اندھیروں میں تاب کاری کر

نئے ستارے کھلا خواب شار جاری کر

بس اب فقیر کی دنیا میں اور دخل نہ دے

تری بساط ہے دل بھر سو شہر یاری کر

میں کاروبار جہاں کو سمیٹ کر آیا

بس اتنی دیر تو دل کی نگاہ داری کر

یہیں کہیں کسی لمحے میں دل بھی ہے لرزاں

توجہ سارے زمانوں پہ باری باری کر

وہی نہ ہو کہ یہ سب لوگ سانس لینے لگیں

امیر شہر کوئی اور خوف طاری کر

یہ قحط نور تو بابرؔ خبر نہیں کب جائے

سو دل کے عرصۂ خالی میں خوابیاری کر

gul-e-sukhan se andheron mein tab kari kar

nae sitare khula khwab shar jari kar

bas ab faqir ki duniya mein aur dakhl na de

tiri bisat hai dil bhar so shahr yari kar

main karobar-e-jahan ko samet kar aya

bas itni der to dil ki nigah dari kar

yahin kahin kisi lamhe mein dil bhi hai larzan

tawajjoh sare zamanon pe bari bari kar

wahi na ho ke ye sab log sans lene lagen

amir-e-shahr koi aur khauf tari kar

ye qaht nur to babar khabar nahin kab jae

so dil ke arsa-e-khali mein khwabyari kar