پھول نے ٹہنی سے اڑنے کی کوشش کی

پھول نے ٹہنی سے اڑنے کی کوشش کی

اک طائر کا دل رکھنے کی کوشش کی

کل پھر چاند کا خنجر گھونپ کے سینے میں

رات نے میری جاں لینے کی کوشش کی

کوئی نہ کوئی رہبر رستہ کاٹ گیا

جب بھی اپنی رہ چلنے کی کوشش کی

کتنی لمبی خاموشی سے گزرا ہوں

ان سے کتنا کچھ کہنے کی کوشش کی

ایک ہی خواب نے ساری رات جگایا ہے

میں نے ہر کروٹ سونے کی کوشش کی

ایک ستارہ جلدی جلدی ڈوب گیا

میں نے جب تارے گننے کی کوشش کی

نام مرا تھا اور پتہ اپنے گھر کا

اس نے مجھ کو خط لکھنے کی کوشش کی

ایک دھوئیں کا مرغولہ سا نکلا ہے

مٹی میں جب دل بونے کی کوشش کی

phul ne tahni se urne ki koshish ki

ik tair ka dil rakhne ki koshish ki

kal phir chand ka khanjar ghonip ke sine mein

rat ne meri jan lene ki koshish ki

koi na koi rahbar rasta kat gaya

jab bhi apni rah chalne ki koshish ki

kitni lambi khamoshi se guzra hun

un se kitna kuchh kahne ki koshish ki

ek hi khwab ne sari rat jagaya hai

main ne har karwat sone ki koshish ki

ek sitara jaldi jaldi dub gaya

main ne jab tare ginne ki koshish ki

nam mira tha aur pata apne ghar ka

us ne mujh ko khat likhne ki koshish ki

ek dhuen ka marghula sa nikla hai

mitti mein jab dil bone ki koshish ki