Arooz is now on the App Store, for iPhone and iPad. Download →

All poetry

بے سبب مسکرا رہا ہے چاند

Gulzar (b. 1934)

بے سبب مسکرا رہا ہے چاند

کوئی سازش چھپا رہا ہے چاند

جانے کس کی گلی سے نکلا ہے

جھینپا جھینپا سا آ رہا ہے چاند

کتنا غازہ لگایا ہے منہ پر

دھول ہی دھول اڑا رہا ہے چاند

کیسا بیٹھا ہے چھپ کے پتوں میں

باغباں کو ستا رہا ہے چاند

سیدھا سادہ افق سے نکلا تھا

سر پہ اب چڑھتا جا رہا ہے چاند

چھو کے دیکھا تو گرم تھا ماتھا

دھوپ میں کھیلتا رہا ہے چاند