جب چھائی گھٹا لہرائی دھنک اک حسن مکمل یاد آیا

جب چھائی گھٹا لہرائی دھنک اک حسن مکمل یاد آیا

ان ہاتھوں کی مہندی یاد آئی ان آنکھوں کا کاجل یاد آیا

سو طرح سے خود کو بہلا کر ہم جس کو بھلائے بیٹھے تھے

کل رات اچانک جانے کیوں وہ ہم کو مسلسل یاد آیا

تنہائی کے سائے بزم میں بھی پہلو سے جدا جب ہو نہ سکے

جو عمر کسی کے ساتھ کٹی اس عمر کا پل پل یاد آیا

جو زیست کے تپتے صحرا پر بھولے سے کبھی برسا بھی نہیں

ہر موڑ پہ ہر اک منزل پر پھر کیوں وہی بادل یاد آیا

ہم زود فراموشی کے لیے بدنام بہت ہیں پھر بھی بشرؔ

جب جب بھی چلی مدماتی پون اڑتا ہوا آنچل یاد آیا

jab chhai ghata lahrai dhanak ik husn mukammal yad aya

in hathon ki mehndi yad ai in ankhon ka kajal yad aya

sau tarah se khud ko bahla kar ham jis ko bhulae baithe the

kal rat achanak jane kyun wo ham ko musalsal yad aya

tanhai ke sae bazm mein bhi pahlu se juda jab ho na sake

jo umr kisi ke sath kati is umr ka pal pal yad aya

jo zist ke tapte sahra par bhule se kabhi barsa bhi nahin

har mor pe har ik manzil par phir kyun wahi badal yad aya

ham zud faramoshi ke liye badnam bahut hain phir bhi bashar

jab jab bhi chali madmati pawan urta hua anchal yad aya