بازار زندگی میں جمے کیسے اپنا رنگ

بازار زندگی میں جمے کیسے اپنا رنگ

ہیں مشتری کے طور نہ بیوپاریوں کے ڈھنگ

مدت سے پھر رہا ہوں خود اپنی تلاش میں

ہر لمحہ لڑ رہا ہوں خود اپنے خلاف جنگ

اک نام لوح ذہن سے مٹتا نہیں ہے کیوں

کیوں آخر اس پہ وقت چڑھاتا نہیں ہے رنگ

اس سے الگ بھی عمر تو کٹ ہی گئی مگر

ایک ایک پل کے بوجھ سے دکھتا ہے انگ انگ

شاخ نہال ذہن پہ خوابوں کے پھول تھے

ہوتا نہ اپنا دست جنوں کاش زیر سنگ

آواز کے حصار میں دل اب بھی قید ہے

مانگے ہے اب بھی پیرہن لفظ ہر امنگ

کچھ تجربہ بھی اب تو زمانے کا ہو گیا

کچھ دل کے بچپنے سے بھی ہم آ گئے ہیں تنگ

کوچہ بہ کوچہ پھرتے ہیں اب اس طرح بشرؔ

بھٹکے ہے جیسے ہاتھ سے ٹوٹی ہوئی پتنگ

bazar-e-zindagi mein jame kaise apna rang

hain mushtari ke tur na biwpariyon ke dhang

muddat se phir raha hun khud apni talash mein

har lamha lar raha hun khud apne khilaf-e-jang

ik nam lauh-e-zehn se mitta nahin hai kyun

kyun akhir us pe waqt charhata nahin hai rang

us se alag bhi umr to kat hi gai magar

ek ek pal ke bojh se dikhta hai ang ang

shakh-e-nihal-e-zehn pe khwabon ke phul the

hota na apna dast-e-junun kash zer-e-sang

awaz ke hisar mein dil ab bhi qaid hai

mange hai ab bhi pairahan-e-lafz har umang

kuchh tajriba bhi ab to zamane ka ho gaya

kuchh dil ke bachpane se bhi ham a gae hain tang

kucha ba kucha phirte hain ab is tarah bashar

bhatke hai jaise hath se tuti hui patang