عکس ہر روز کسی غم کا پڑا کرتا ہے

عکس ہر روز کسی غم کا پڑا کرتا ہے

دل وہ آئینہ کہ چپ چاپ تکا کرتا ہے

بہتے پانی کی طرح درد کی بھی شکل نہیں

جب بھی ملتا ہے نیا روپ ہوا کرتا ہے

میں تو بہروپ ہوں اس کا جو ہے میرے اندر

وہ کوئی اور ہے جو مجھ میں جیا کرتا ہے

رنگ سا روز بکھر جاتا ہے دیواروں پر

کچھ دیئے جیسا دریچے میں جلا کرتا ہے

جانے وہ کون ہے جو رات کے سناٹے میں

کبھی روتا ہے کبھی خود پہ ہنسا کرتا ہے

روز راہوں سے گزرتا ہے صداؤں کا جلوس

دل کا سناٹا مگر روز بڑھا کرتا ہے

aks har roz kisi gham ka para karta hai

dil wo aina ke chup chap taka karta hai

bahte pani ki tarah dard ki bhi shakl nahin

jab bhi milta hai naya rup hua karta hai

main to bahrup hun us ka jo hai mere andar

wo koi aur hai jo mujh mein jiya karta hai

rang sa roz bikhar jata hai diwaron par

kuchh diye jaisa dariche mein jala karta hai

jane wo kaun hai jo rat ke sannate mein

kabhi rota hai kabhi khud pe hansa karta hai

roz rahon se guzarta hai sadaon ka julus

dil ka sannata magar roz barha karta hai