روز کہاں سے کوئی نیاپن اپنے آپ میں لائیں گے

روز کہاں سے کوئی نیاپن اپنے آپ میں لائیں گے

تم بھی تنگ آ جاؤ گے اک دن ہم بھی اکتا جائیں گے

چڑھتا دریا ایک نہ اک دن خود ہی کنارے کاٹے گا

اپنے ہنستے چہرے کتنے طوفانوں کو چھپائیں گے

آگ پہ چلتے چلتے اب تو یہ احساس بھی کھو بیٹھے

کیا ہوگا زخموں کا مداوا دامن کیسے بچائیں گے

وہ بھی کوئی ہم ہی سا معصوم گناہوں کا پتلا تھا

ناحق اس سے لڑ بیٹھے تھے اب مل جائے منائیں گے

اس جانب ہم اس جانب تم بیچ میں حائل ایک الاؤ

کب تک ہم تم اپنے اپنے خوابوں کو جھلسائیں گے

سرما کی رت کاٹ کے آنے والے پرندو یہ تو کہو

دور دیس کو جانے والے کب تک لوٹ کے آئیں گے

تیز ہوائیں آنکھوں میں تو ریت دکھوں کی بھر ہی گئیں

جلتے لمحے رفتہ رفتہ دل کو بھی جھلسائیں گے

محفل محفل اپنا تعلق آج ہے اک موضوع سخن

کل تک ترک تعلق کے بھی افسانے بن جائیں گے

roz kahan se koi nayapan apne ap mein laenge

tum bhi tang a jaoge ik din ham bhi ukta jaenge

charhta dariya ek na ik din khud hi kinare katega

apne hanste chehre kitne tufanon ko chhupaenge

ag pe chalte chalte ab to ye ehsas bhi kho baithe

kya hoga zakhmon ka mudawa daman kaise bachaenge

wo bhi koi ham hi sa maasum gunahon ka putla tha

nahaq us se lar baithe the ab mil jae manaenge

us janib ham us janib tum bich mein hail ek alao

kab tak ham tum apne apne khwabon ko jhulsaenge

sarma ki rut kat ke ane wale parindo ye to kaho

dur des ko jane wale kab tak laut ke aenge

tez hawaen ankhon mein to ret dukhon ki bhar hi gain

jalte lamhe rafta rafta dil ko bhi jhulsaenge

mahfil mahfil apna taalluq aj hai ik mauzu-e-sukhan

kal tak tark-e-taalluq ke bhi afsane ban jaenge