کس کے چمکے چاند سے رخسار قیصر باغ میں

کس کے چمکے چاند سے رخسار قیصر باغ میں

چاندنی ہے سایۂ دیوار قیصر باغ میں

فی الحقیقت یہ بھی کم گلزار جنت سے نہیں

حوریں پھرتی ہیں سر بازار قیصر باغ میں

پاؤں کا یاں ذکر کیسا صاف ہے ایسی زمیں

دل پھسلتے ہیں دم رفتار قیصر باغ میں

زیر شاخ گل اگر سبزہ کبھی سونے لگا

شور بلبل نے کیا بیدار قیصر باغ میں

اتنے پتے بھی نہ ہوں گے گلشن فردوس میں

جس قدر پھولوں کے ہیں انبار قیصر باغ میں

تشنگان‌ شوق ہیں شیریں لبوں کے میہماں

بٹ رہا ہے شربت دیدار قیصر باغ میں

قطرے شبنم کے رگ گل پر دکھاتے ہیں بہار

گندھ رہے ہیں موتیوں کے ہار قیصر باغ میں

سایۂ بال ہما کیا ڈھونڈھتا ہے اے امیرؔ

بیٹھ زیر سایۂ دیوار قیصر باغ میں

kis ke chamke chand se rukhsar qaisar bagh mein

chandni hai saya-e-diwar qaisar bagh mein

fi alhaqiqat ye bhi kam gulzar jannat se nahin

huren phirti hain sar-e-bazar qaisar bagh mein

paon ka yan zikr kaisa saf hai aisi zamin

dil phisalte hain dam-e-raftar qaisar bagh mein

zer-e-shakh-e-gul agar sabza kabhi sone laga

shor-e-bulbul ne kiya bedar qaisar bagh mein

itne patte bhi na honge gulshan-e-firdaus mein

jis qadar phulon ke hain ambar qaisar bagh mein

tashnagan-e-shauq hain shirin labon ke mehman

bat raha hai sharbat-e-didar qaisar bagh mein

qatre shabnam ke rag-e-gul par dikhate hain bahar

gandh rahe hain motiyon ke har qaisar bagh mein

saya-e-bal-e-huma kya dhundhta hai ai amir

baith zer-e-saya-e-diwar qaisar bagh mein