شمع کا مے کا شفق زار کا گلزار کا رنگ

شمع کا مے کا شفق زار کا گلزار کا رنگ

سب ہیں اور سب سے جدا ہے لب دیدار کا رنگ

عکس ساقی سے چمک اٹھی ہے ساغر کی جبیں

اور کچھ تیز ہوا بادۂ گلنار کا رنگ

شیخ میں ہمت رندان قدح خوار کہاں

ایک ہی جام میں آشفتہ ہے دستار کا رنگ

ان کے آنے کو چھپاؤں تو چھپاؤں کیوں کر

بدلا بدلا سا ہے میرے در و دیوار کا رنگ

شفق صبح شہادت سے ہے تابندہ جبیں

ورنہ آلودۂ خوں تھا افق دار کا رنگ

آفتابوں کی طرح جاگی ہے انسان کی جوت

جگمگاتا ہے سرا پردۂ اسرار کا رنگ

وقت کی روح منور ہے نوا سے میری

عصر نو میں ہے مری شوخئ افکار کا رنگ

shama ka mai ka shafaq zar ka gulzar ka rang

sab hain aur sab se juda hai lab-e-didar ka rang

aks saqi se chamak uthi hai saghar ki jabin

aur kuchh tez hua bada-e-gulnar ka rang

shaikh mein himmat-e-rindan-e-qadah khwar kahan

ek hi jam mein ashufta hai dastar ka rang

un ke ane ko chhupaun to chhupaun kyun kar

badla badla sa hai mere dar-o-diwar ka rang

shafaq-e-subh-e-shahadat se hai tabinda jabin

warna aluda-e-khun tha ufuq dar ka rang

aftabon ki tarah jagi hai insan ki jot

jagmagata hai sara parda-e-asrar ka rang

waqt ki ruh munawwar hai nawa se meri

asr-e-nau mein hai miri shokhi-e-afkar ka rang