یہ شان وفا غم کی حکایت سے ملی ہے

یہ شان وفا غم کی حکایت سے ملی ہے

دولت مجھے یہ درد محبت سے ملی ہے

عالم کو بہاراں ہے کئے اس کی تمنا

گلشن کو مہک پھول کی صحبت سے ملی ہے

اک حشر ہے اس کا کسی کوچے سے گزرنا

رفتار کی حد حد قیامت سے ملی ہے

ذرے سے جو سنتا ہوں میں سورج کی کہانی

یہ آگہی مدت کی ریاضت سے ملی ہے

مشکل کی ہر اک شکل پہ میرا ہے تصرف

مجھ کو یہ سند شاہ ولایت سے ملی ہے

اس قوم کے اب کوئی بھٹکنے کا نہیں ڈر

منزل جسے صدیوں کی مسافت سے ملی ہے

تم یاد نہ رکھو مجھے لیکن یہ رہے یاد

شہرت تمہیں میری ہی محبت سے ملی ہے

ye shan-e-wafa gham ki hikayat se mili hai

daulat mujhe ye dard-e-mohabbat se mili hai

alam ko baharan hai kiye us ki tamanna

gulshan ko mahak phul ki sohbat se mili hai

ik hashr hai us ka kisi kuche se guzarna

raftar ki had had-e-qayamat se mili hai

zarre se jo sunta hun main suraj ki kahani

ye agahi muddat ki riyazat se mili hai

mushkil ki har ik shakl pe mera hai tasarruf

mujh ko ye sanad shah-e-wilayat se mili hai

is qaum ke ab koi bhatakne ka nahin dar

manzil jise sadiyon ki masafat se mili hai

tum yad na rakho mujhe lekin ye rahe yad

shohrat tumhen meri hi mohabbat se mili hai