سرد ہیں دل آتش روئے نگاراں چاہئے

سرد ہیں دل آتش روئے نگاراں چاہئے

شعلۂ رنگ بہار گل عذاراں چاہئے

منزل عشق و جنوں کے فاصلے ہیں سر بکف

ان کٹھن راہوں میں لطف دست یاراں چاہئے

کٹ رہی ہے اور کٹ چکتی نہیں فصل خزاں

تیز تر اک اور تیغ نو بہاراں چاہئے

آج مے خانہ میں سحر چشم ساقی کے لیے

التفات‌ چشم مست میگساراں چاہئے

اس دل وحشی کی آزادی کا کیا کیجے علاج

اک کمند گیسوئے یزداں شکاراں چاہئے

نغمہ بن جاتا ہے نالہ ان کی بزم ناز میں

ان کو خوش رکھنے کو شور سوگواراں چاہئے

آسمانوں سے برستے ہیں زمیں پر ریگزار

آج پھر سردارؔ رقص‌ برق و باراں چاہئے

sard hain dil atish-e-ru-e-nigaran chahiye

shola-e-rang-e-bahar-e-gul izaran chahiye

manzil-e-ishq-o-junun ke fasle hain sar bakaf

un kathin rahon mein lutf-e-dast-e-yaran chahiye

kat rahi hai aur kat chukti nahin fasl-e-khizan

tez tar ik aur tegh-e-nau baharan chahiye

aj mai khana mein sahar chashm-e-saqi ke liye

iltifat-e-chashm-e-mast megsaran chahiye

is dil-e-wahshi ki azadi ka kya kije ilaj

ik kamand-e-gesu-e-yazdan shikaran chahiye

naghma ban jata hai nala un ki bazm-e-naz mein

un ko khush rakhne ko shor sogwaran chahiye

asmanon se baraste hain zamin par regzar

aj phir sardar raqs-e-barq-o-baran chahiye