چشم بد مست کو پھر شیوۂ دلداری دے
Ali Sardar Jafri (1913–2000)چشم بد مست کو پھر شیوۂ دلداری دے
دل آوارہ کو پیغام گرفتاری دے
عشق ہے سادہ و معصوم اسے اپنی طرح
جوہر تیغ ادا خنجر عیاری دے
جو دکھے دل ہیں انہیں دولت درماں ہو عطا
درد کے ہاتھ میں مت کاسۂ ناداری دے
کتنی فرسودہ ہے یہ جرم و سزا کی دنیا
سرکشی دل کو نیا ذوق گنہ گاری دے
شاخ گل کب سے ہے سینے میں چھپائے ہوئے گل
دیکھیں کب باد صبا حکم چمن کاری دے
اے مرے شعلۂ دل شعلۂ شعر و دانش
رات آخر ہے اسے جشن شرر باری دے
چمن افسردہ ہے اے جان چمن روح بہار
گل کو بھی اپنے تبسم کی فسوں کاری دے
chashm-e-bad mast ko phir shewa-e-dildari de
dil-e-awara ko paigham giraftari de
ishq hai sada-o-maasum use apni tarah
jauhar-e-tegh-e-ada khanjar-e-ayyari de
jo dikhe dil hain unhen daulat-e-darman ho ata
dard ke hath mein mat kasa-e-nadari de
kitni farsuda hai ye jurm-o-saza ki duniya
sarkashi dil ko naya zauq-e-gunah gari de
shakh-e-gul kab se hai sine mein chhupae hue gul
dekhen kab bad-e-saba hukm-e-chaman kari de
ai mire shola-e-dil shola-e-sher-o-danish
rat akhir hai use jashn-e-sharar bari de
chaman afsurda hai ai jan-e-chaman ruh-e-bahar
gul ko bhi apne tabassum ki fusun kari de