خوگر روئے خوش جمال ہیں ہم

خوگر روئے خوش جمال ہیں ہم

ناز پروردۂ وصال ہیں ہم

ہم کو یوں رائیگاں نہ کر دینا

حاصل فصل ماہ و سال ہیں ہم

رنگ ہی رنگ خوشبو ہی خوشبو

گردش ساغر خیال ہیں ہم

رونق کاروبار ہستی ہیں

ہم نے مانا شکستہ حال ہیں ہم

مال و زر، مال و زر کی قیمت کیا

صاحب دولت کمال ہیں ہم

کس کی رعنائی خیال ہے تو

تیری رعنائی جمال ہیں ہم

ایسے دیوانے پھر نہ آئیں گے

دیکھ لو ہم کو بے مثال ہیں ہم

دولت حسن لا زوال ہے تو

دولت عشق لا زوال ہیں ہم

khugar-e-ru-e-khush jamal hain ham

naz parwarda-e-wisal hain ham

ham ko yun raigan na kar dena

hasil-e-fasl-e-mah-o-sal hain ham

rang hi rang khushbu hi khushbu

gardish-e-saghar-e-khayal hain ham

raunaq-e-karobar-e-hasti hain

ham ne mana shikasta hal hain ham

mal-o-zar, mal-o-zar ki qimat kya

sahab-e-daulat-e-kamal hain ham

kis ki raanai-e-khayal hai tu

teri raanai-e-jamal hain ham

aise diwane phir na aenge

dekh lo ham ko be misal hain ham

daulat-e-husn la zawal hai tu

daulat-e-ishq la zawal hain ham