کتنی آشاؤں کی لاشیں سوکھیں دل کے آنگن میں

کتنی آشاؤں کی لاشیں سوکھیں دل کے آنگن میں

کتنے سورج ڈوب گئے ہیں چہروں کے پیلے پن میں

بچوں کے میٹھے ہونٹوں پر پیاس کی سوکھی ریت جمی

دودھ کی دھاریں گائے کے تھن سے گر گئیں ناگوں کے پھن میں

ریگستانوں میں جلتے ہیں پڑے ہوئے سو نقش قدم پر

آج خراماں کوئی نہیں ہے امیدوں کے گلشن میں

چکنا چور ہوا خوابوں کا دل کش دلچسپ آئینہ

ٹیڑھی ترچھی تصویریں ہیں ٹوٹے پھوٹے درپن میں

پائے جنوں میں پڑی ہوئی ہیں حرص و ہوا کی زنجیریں

قید ہے اب تک ہاتھ سحر کا تاریکی کے کنگن میں

آنکھوں کی کچھ نورس کلیاں نیم شگفتہ غنچۂ لب

کیسے کیسے پھول بھرے ہیں گلچینوں کے دامن میں

دست غیب کی طرح چھپا ہے ظلم کا ہاتھ ستم کا وار

خشک لہو کی بارش دیکھی ہم نے کوچہ و برزن میں

kitni ashaon ki lashen sukhen dil ke angan mein

kitne suraj dub gae hain chehron ke pile pan mein

bachchon ke mithe honton par pyas ki sukhi ret jami

dudh ki dharen gae ke than se gar gain nagon ke phan mein

registanon mein jalte hain pare hue so naqsh-e-qadam par

aj khiraman koi nahin hai ummidon ke gulshan mein

chukna chur hua khwabon ka dil kash dilchasp aina

terhi tirchhi taswiren hain tute phute darpan mein

pae junun mein pari hui hain hirs-o-hawa ki zanjiren

qaid hai ab tak hath sahar ka tariki ke kangan mein

ankhon ki kuchh nauras kaliyan nim shagufta ghuncha-e-lab

kaise kaise phul bhare hain gulchainon ke daman mein

dast-e-ghaib ki tarah chhupa hai zulm ka hath sitam ka war

khushk lahu ki barish dekhi ham ne kucha-o-barzan mein