فروغ دیدہ و دل لالۂ سحر کی طرح

فروغ دیدہ و دل لالۂ سحر کی طرح

اجالا بن کے رہو شمع رہ گزر کی طرح

پیمبروں کی طرح سے جیو زمانے میں

پیام شوق بنو دولت ہنر کی طرح

یہ زندگی بھی کوئی زندگی ہے ہم نفسو

ستارہ بن کے جلے بجھ گئے شرر کی طرح

ڈرا سکی نہ مجھے تیرگی زمانے کی

اندھیری رات سے گزرا ہوں میں قمر کی طرح

سمندروں کے تلاطم نے مجھ کو پالا ہے

چمک رہا ہوں اسی واسطے گہر کی طرح

تمام کوہ و تل و بحر و بر ہیں زیر نگیں

کھلا ہوا ہوں میں شاہیں کے بال و پر کی طرح

تمام دولت کونین ہے خراج اس کا

یہ دل نہیں کسی لوٹے ہوئے نگر کی طرح

گزر کے خار سے غنچے سے گل سے شبنم سے

میں شاخ وقت میں آیا ہوں اک ثمر کی طرح

میں دل میں تلخیٔ زہراب غم بھی رکھتا ہوں

نہ مثل شہد ہوں شیریں نہ میں شکر کی طرح

خزاں کے دست ستم نے مجھے چھوا ہے مگر

تمام شعلہ و شبنم ہوں کاشمر کی طرح

مری نوا میں ہے لطف و سرور صبح نشاط

ہر ایک شعر ہے رندوں کی شام تر کی طرح

یہ فاتحانہ غزل عصر نو کا ہے آہنگ

بلند و پست کو دیکھا ہے دیدہ ور کی طرح

farogh-e-dida-o-dil lala-e-sahar ki tarah

ujala ban ke raho sham-e-rah guzar ki tarah

payambaron ki tarah se jiyo zamane mein

payam-e-shauq bano daulat-e-hunar ki tarah

ye zindagi bhi koi zindagi hai ham nafaso

sitara ban ke jale bujh gae sharar ki tarah

dara saki na mujhe tirgi zamane ki

andheri rat se guzra hun main qamar ki tarah

samundaron ke talatum ne mujh ko pala hai

chamak raha hun isi waste guhar ki tarah

tamam koh-o-til-o-bahr-o-bar hain zer-e-nagin

khula hua hun main shahin ke bal-o-par ki tarah

tamam daulat-e-kaunain hai khiraj us ka

ye dil nahin kisi laute hue nagar ki tarah

guzar ke khar se ghunche se gul se shabnam se

main shakh-e-waqt mein aya hun ik samar ki tarah

main dil mein talkhi-e-zahrab gham bhi rakhta hun

na misl-e-shahd hun shirin na main shakar ki tarah

khizan ke dast-e-sitam ne mujhe chhua hai magar

tamam shola-o-shabnam hun kashimr ki tarah

miri nawa mein hai lutf-o-surur subh-e-nishat

har ek sher hai rindon ki sham tar ki tarah

ye fatihana ghazal asr-e-nau ka hai ahang

buland-o-past ko dekha hai dida war ki tarah