بیٹھے ہیں جہاں ساقی پیمانۂ زر لے کر

بیٹھے ہیں جہاں ساقی پیمانۂ زر لے کر

اس بزم سے اٹھ آئے ہم دیدۂ تر لے کر

یادوں سے تری روشن محراب شب ہجراں

ڈھونڈھیں گے تجھے کب تک قندیل قمر لے کر

کیا حسن ہے دنیا میں کیا لطف ہے جینے میں

دیکھے تو کوئی میرا انداز نظر لے کر

ہوتی ہے زمانے میں کس طرح پذیرائی

نکلو تو ذرا گھر سے اک ذوق سفر لے کر

راہیں چمک اٹھیں گی خورشید کی مشعل سے

ہم راہ صبا ہوگی خوشبوئے سحر لے کر

مخمل سی بچھا دیں گے قدموں کے تلے ساحل

دریا ابل آئیں گے صد موج گہر لے کر

پنہائیں گے تاج اپنا پیڑوں کے گھنے سائے

نکلیں گے شجر اپنے خوش رنگ ثمر لے کر

لپکیں گے گلے ملنے سرو اور صنوبر سب

اٹھیں گے گلستاں بھی شاخ گل تر لے کر

ہنستے ہوئے شہروں کی آواز بلائے گی

لب جام کے چمکیں گے سو شعلۂ تر لے کر

افلاک بجائیں گے ساز اپنے ستاروں کا

گائیں گے بہت لمحے انفاس شرر لے کر

یہ عالم خاکی اک سیارۂ روشن ہے

افلاک سے ٹکرا دو تقدیر بشر لے کر

baithe hain jahan saqi paimana-e-zar le kar

is bazm se uth ae ham dida-e-tar le kar

yadon se tiri raushan mehrab-e-shab hijran

dhundhenge tujhe kab tak qindil-e-qamar le kar

kya husn hai duniya mein kya lutf hai jine mein

dekhe to koi mera andaz-e-nazar le kar

hoti hai zamane mein kis tarah pazirai

niklo to zara ghar se ik zauq-e-safar le kar

rahen chamak uthengi khurshid ki mashal se

ham rah saba hogi khushbu-e-sahar le kar

makhmal si bichha denge qadmon ke tale sahil

dariya ubal aenge sad mauj-e-guhar le kar

panhaen ge taj apna peron ke ghane sae

niklenge shajar apne khush rang samar le kar

lapkenge gale milne sarw aur sanobar sab

uthenge gulistan bhi shakh-e-gul-e-tar le kar

hanste hue shahron ki awaz bala-e-gi

lab jam ke chamkenge so shola-e-tar le kar

aflak bajaenge saz apne sitaron ka

gaenge bahut lamhe anfas-e-sharar le kar

ye alam khaki ik sayyara-e-raushan hai

aflak se takra do taqdir bashar le kar