لو کے موسم میں بہاروں کی ہوا مانگتے ہیں

لو کے موسم میں بہاروں کی ہوا مانگتے ہیں

ہم کف دست خزاں پر بھی حنا مانگتے ہیں

ہم نشیں سادہ دلی ہائے تمنا مت پوچھ

بے وفاؤں سے وفاؤں کا صلہ مانگتے ہیں

کاش کر لیتے کبھی کعبۂ دل کا بھی طواف

وہ جو پتھر کے مکانوں سے خدا مانگتے ہیں

جس میں ہو سطوت شاہین کی پرواز کا رنگ

لب شاعر سے وہ بلبل کی نوا مانگتے ہیں

تاکہ دنیا پہ کھلے ان کا فریب انصاف

بے خطا ہو کے خطاؤں کی سزا مانگتے ہیں

تیرگی جتنی بڑھے حسن ہو افزوں تیرا

کہکشاں مانگ میں ماتھے پہ ضیا مانگتے ہیں

یہ ہے وارفتگئ شوق کا عالم سردارؔ

بارش سنگ ہے اور باد صبا مانگتے ہیں

lo ke mausam mein baharon ki hawa mangte hain

ham kaf-e-dast-e-khizan par bhi hina mangte hain

ham nashin sada dili hae tamanna mat puchh

be wafaon se wafaon ka sila mangte hain

kash kar lete kabhi kaaba-e-dil ka bhi tawaf

wo jo patthar ke makanon se khuda mangte hain

jis mein ho satwat-e-shahin ki parwaz ka rang

lab-e-shayar se wo bulbul ki nawa mangte hain

take duniya pe khule un ka fareb-e-insaf

be khata ho ke khataon ki saza mangte hain

tirgi jitni barhe husn ho afzun tera

kahkashan mang mein mathe pe ziya mangte hain

ye hai waraftagi-e-shauq ka alam sardar

barish-e-sang hai aur bad-e-saba mangte hain