آندھیاں چلتی رہیں افلاک تھراتے رہے

آندھیاں چلتی رہیں افلاک تھراتے رہے

اپنا پرچم ہم بھی طوفانوں میں لہراتے رہے

کاٹ کر راتوں کے پربت عصر نو کے تیشہ زن

جوئے شیر و چشمۂ نور سحر لاتے رہے

کاروان ہمت جمہور بڑھتا ہی گیا

شہر یار و حکمراں آتے رہے جاتے رہے

رہبروں کی بھول تھی یا رہبری کا مدعا

قافلوں کو منزلوں کے پاس بھٹکاتے رہے

جس قدر بڑھتا گیا ظالم ہواؤں کا خروش

اس کے کاکل اور بھی عارض پہ لہراتے رہے

پھانسیاں اگتی رہیں زنداں ابھرتے ہی رہے

چند دیوانے جنوں کے زمزمے گاتے رہے

andhiyan chalti rahen aflak tharrate rahe

apna parcham ham bhi tufanon mein lahrate rahe

kat kar raton ke parbat asr-e-nau ke tesha zan

ju-e-sher-o-chashma-e-nur-e-sahar late rahe

karwan-e-himmat-e-jamhur barhta hi gaya

shahr-e-yar-o-hukmaran ate rahe jate rahe

rahbaron ki bhul thi ya rahbari ka muddaa

qafilon ko manzilon ke pas bhatkate rahe

jis qadar barhta gaya zalim hawaon ka kharosh

us ke kakul aur bhi ariz pe lahrate rahe

phansiyan ugti rahen zindan ubharte hi rahe

chand diwane junun ke zamzame gate rahe