وہ مری دوست وہ ہمدرد وہ غم خوار آنکھیں

وہ مری دوست وہ ہمدرد وہ غم خوار آنکھیں

ایک معصوم محبت کی گنہ گار آنکھیں

شوخ و شاداب و حسیں سادہ و پرکار آنکھیں

مست و سرشار و جواں بے خود و ہشیار آنکھیں

ترچھی نظروں میں وہ الجھی ہوئی سورج کی کرن

اپنے دزدیدہ اشاروں میں گرفتار آنکھیں

جنبش ابرو و مژگاں کے خنک سائے میں

آتش افروز جنوں خیز شرر بار آنکھیں

کیفیت دل کی سناتی ہوئی ایک ایک نگاہ

بے زباں ہو کے بھی وہ مائل گفتار آنکھیں

موسم گل میں وہ اڑتے ہوئے بھونروں کی طرح

غنچۂ دل پہ وہ کرتی ہوئی یلغار آنکھیں

کبھی چھلکی ہوئی شربت کے کٹوروں کی طرح

اور کبھی زہر میں ڈوبی ہوئی تلوار آنکھیں

کبھی ٹھہری ہوئی یخ بستہ غموں کی جھیلیں

کبھی سہما ہوا سمٹا ہوا اک پیار آنکھیں

کبھی جھکتے ہوئے بادل کبھی گرتی بجلی

کبھی اٹھتی ہوئی آمادۂ پیکار آنکھیں

نوک ابرو میں کبھی تلخئ انکار لیے

کبھی گھولے ہوئے شیرینئ اقرار آنکھیں

آنچ میں اپنی جوانی کی سلگتی چتون

شبنم اشک میں دھوئی ہوئی گلنار آنکھیں

حسن کے چاند سے مکھڑے پہ چمکتے تارے

ہائے آنکھیں وہ حریف‌ لب و رخسار آنکھیں

عشوہ و غمزہ و انداز و ادا پر نازاں

اپنے پندار جوانی کی پرستار آنکھیں

روح کو روگ محبت کا لگا دیتی ہیں

صحت دل جو عطا کرتی ہیں بیمار آنکھیں

صحن زنداں میں ہے پھر رات کے تاروں کا ہجوم

شمع کی طرح فروزاں سر دیوار آنکھیں

wo miri dost wo hamdard wo gham khwar ankhen

ek maasum mohabbat ki gunah gar ankhen

shokh-o-shadab-o-hasin sada-o-parkar ankhen

mast-o-sarshar-o-jawan be khud-o-hushyar ankhen

tirchhi nazron mein wo uljhi hui suraj ki kiran

apne duzdida isharon mein giraftar ankhen

jumbish-e-abru-o-mizhgan ke khunuk sae mein

atish afroz junun khez sharar bar ankhen

kaifiyat-e-dil ki sunati hui ek ek nigah

be zaban ho ke bhi wo mail-e-guftar ankhen

mausam-e-gul mein wo urte hue bhaunron ki tarah

ghuncha-e-dil pe wo karti hui yalghar ankhen

kabhi chhalki hui sharbat ke katoron ki tarah

aur kabhi zahr mein dubi hui talwar ankhen

kabhi thahri hui yakh basta ghamon ki jhelen

kabhi sahma hua simta hua ik pyar ankhen

kabhi jhukte hue badal kabhi girti bijli

kabhi uthti hui amada-e-paikar ankhen

nok-e-abru mein kabhi talkhi-e-inkar liye

kabhi ghole hue shirini-e-iqrar ankhen

anch main apni jawani ki sulagti chitwan

shabnam-e-ashk mein dhoi hui gulnar ankhen

husn ke chand se mukhre pe chamakte tare

hae ankhen wo harif-e-lab-o-rukhsar ankhen

ishwa-o-ghamza-o-andaz-o-ada par nazan

apne pindar-e-jawani ki parastar ankhen

ruh ko rog mohabbat ka laga deti hain

sehhat-e-dil jo ata karti hain bimar ankhen

sehn-e-zindan mein hai phir rat ke taron ka hujum

shama ki tarah farozan sar-e-diwar ankhen